ಇಂದಿನ ಡಿಜಿಟಲ್ ಯುಗದಲ್ಲಿ ಯುಪಿಐ ಮೂಲಕ ಹಣ ಪಾವತಿ ಮಾಡುವುದರಿಂದ ಹಿಡಿದು, ಹೋಟೆಲ್ ಮೆನು ಸ್ಕ್ಯಾನ್ ಮಾಡುವುದು, ವೈ-ಫೈ ಸಂಪರ್ಕ ಪಡೆಯುವುದು ಹಾಗೂ ಟಿಕೆಟ್ಗಳನ್ನು ಡೌನ್ಲೋಡ್ ಮಾಡುವವರೆಗೆ ಕ್ಯೂಆರ್ (Quick Response) ಕೋಡ್ಗಳು ನಮ್ಮ ದೈನಂದಿನ ಜೀವನದ ಅವಿಭಾಜ್ಯ ಅಂಗವಾಗಿಬಿಟ್ಟಿವೆ.
ಕಪ್ಪು ಮತ್ತು ಬಿಳಿ ಚೌಕಗಳ ವಿನ್ಯಾಸವನ್ನು ಹೊಂದಿರುವ ಈ ಕೋಡ್ಗಳು ಡಿಜಿಟಲ್ ಮಾಹಿತಿಯನ್ನು ತಕ್ಷಣವೇ ಪಡೆಯಲು ನಮಗೆ ನೆರವಾಗುತ್ತಿವೆ. ಸ್ಮಾರ್ಟ್ಫೋನ್ ಕ್ಯಾಮೆರಾವನ್ನು ಕ್ಯೂಆರ್ ಕೋಡ್ಗೆ ಹಿಡಿದ ತಕ್ಷಣವೇ ಮಾಹಿತಿಯನ್ನು ಪ್ರದರ್ಶಿಸುವ ಈ ತಂತ್ರಜ್ಞಾನವು ಅತ್ಯಂತ ರೋಚಕವಾದ ವಿನ್ಯಾಸ ಮತ್ತು ತರ್ಕವನ್ನು ಹೊಂದಿದೆ.
ದಿನನಿತ್ಯ ಕೋಟ್ಯಂತರ ಜನರು ಕ್ಯೂಆರ್ ಕೋಡ್ಗಳನ್ನು ಸ್ಕ್ಯಾನ್ ಮಾಡುತ್ತಾರಾದರೂ, ಹೆಚ್ಚಿನವರು ಗಮನಿಸದ ಒಂದು ಸಂಗತಿಯೆಂದರೆ ಕ್ಯೂಆರ್ ಕೋಡ್ನ ನಾಲ್ಕು ಮೂಲೆಗಳ ಪೈಕಿ ಮೂರು ಮೂಲೆಗಳಲ್ಲಿ ಮಾತ್ರ ದೊಡ್ಡ ಕಪ್ಪು ಚೌಕಗಳಿರುತ್ತವೆ ಮತ್ತು ನಾಲ್ಕನೇ ಮೂಲೆಯು ಖಾಲಿಯಾಗಿರುತ್ತದೆ! ಈ ಚೌಕಗಳು ಕೇವಲ ಸೌಂದರ್ಯಕ್ಕಾಗಿ ಮಾಡಿದ ವಿನ್ಯಾಸವಲ್ಲ. ಬದಲಿಗೆ, ಕ್ಯಾಮೆರಾ ಅಥವಾ ಸ್ಕ್ಯಾನರ್ ಯಾವುದೇ ಕೋನದಿಂದಾದರೂ ಕ್ಯೂಆರ್ ಕೋಡ್ ಅನ್ನು ಅತ್ಯಂತ ವೇಗವಾಗಿ ಮತ್ತು ನಿಖರವಾಗಿ ಗುರುತಿಸಲು ನೆರವಾಗುವ ಅತ್ಯಾಧುನಿಕ ತಂತ್ರಜ್ಞಾನವಾಗಿದೆ.
ಈ ದೊಡ್ಡ ಕಪ್ಪು ಚೌಕಗಳನ್ನು ತಾಂತ್ರಿಕ ಭಾಷೆಯಲ್ಲಿ 'ಫೈಂಡರ್ ಪ್ಯಾಟರ್ನ್ಗಳು' (Finder Patterns) ಎಂದು ಕರೆಯಲಾಗುತ್ತದೆ. ನಿಮ್ಮ ಸ್ಮಾರ್ಟ್ಫೋನ್ನಲ್ಲಿ ಸ್ಕ್ಯಾನರ್ ಆನ್ ಮಾಡಿದ ತಕ್ಷಣ, ಆ್ಯಪ್ ಕ್ಯೂಆರ್ ಕೋಡ್ ಅನ್ನು ಹುಡುಕಲು ಈ ಮೂರು ಚೌಕಗಳನ್ನು ಆಧಾರವಾಗಿಟ್ಟುಕೊಳ್ಳುತ್ತದೆ. ಈ ಮೂರು ಚೌಕಗಳ ಕಪ್ಪು ಮತ್ತು ಬಿಳಿ ಗೆರೆಗಳ ಅನುಪಾತವನ್ನು '1:1:3:1:1' ಎಂಬ ನಿರ್ದಿಷ್ಟ ಗಣಿತೀಯ ಸೂತ್ರದಂತೆ ವಿನ್ಯಾಸಗೊಳಿಸಲಾಗಿರುತ್ತದೆ. ಈ ಅನುಪಾತವು ಎಷ್ಟೇ ಗೊಂದಲಮಯ ಅಥವಾ ವರ್ಣರಂಜಿತ ಹಿನ್ನೆಲೆಯಿದ್ದರೂ, ಸ್ಕ್ಯಾನರ್ಗೆ ಇದು ಕ್ಯೂಆರ್ ಕೋಡ್ ಹೌದು ಎಂಬುದನ್ನು ಮಿಲಿಸೆಕೆಂಡ್ಗಳಲ್ಲಿ ಖಚಿತಪಡಿಸುತ್ತದೆ.
ಕ್ಯೂಆರ್ ಕೋಡ್ನ ಮತ್ತೊಂದು ದೊಡ್ಡ ವೈಶಿಷ್ಟ್ಯವೆಂದರೆ, ಅದನ್ನು ಉಲ್ಟಾ ಹಿಡಿದರೂ ಅಥವಾ ಓರೆಯಾದ ಕೋನದಿಂದ ಸ್ಕ್ಯಾನ್ ಮಾಡಿದರೂ ಅದು ತಕ್ಷಣವೇ ಕಾರ್ಯನಿರ್ವಹಿಸುತ್ತದೆ. ಈ ಮೂರು ಫೈಂಡರ್ ಪ್ಯಾಟರ್ನ್ಗಳು ಸ್ಕ್ಯಾನರ್ಗೆ ಕೋಡ್ನ ದಿಕ್ಸೂಚಿ (Orientation), ಕೋಡ್ ತಿರುಗಿರುವ ಕೋನ (Rotation Angle), ಕ್ಯಾಮೆರಾದ ಪರ್ಸ್ಪೆಕ್ಟಿವ್ ಹಾಗೂ ಕೋಡ್ನ ಗಾತ್ರವನ್ನು ನಿರ್ಧರಿಸಲು ನೆರವಾಗುತ್ತವೆ. ಈ ಮೂರು ಸ್ಥಿರ ಬಿಂದುಗಳ ಸಹಾಯದಿಂದ ಸ್ಕ್ಯಾನಿಂಗ್ ಸಾಫ್ಟ್ವೇರ್ ಚಿತ್ರದಲ್ಲಿನ ವ್ಯತ್ಯಾಸವನ್ನು ತನ್ನಷ್ಟಕ್ಕೆ ತಾನೇ ಸರಿಪಡಿಸಿಕೊಂಡು ಮಾಹಿತಿಯನ್ನು ಕ್ಷಣಾರ್ಧದಲ್ಲಿ ಓದುತ್ತದೆ.
ಹಾಗಿದ್ದರೆ, ನಾಲ್ಕನೇ ಮೂಲೆಯಲ್ಲೂ ಇನ್ನೊಂದು ಕಪ್ಪು ಚೌಕವನ್ನು ಇಟ್ಟರೆ ಸ್ಕ್ಯಾನಿಂಗ್ ಇನ್ನೂ ವೇಗವಾಗುತ್ತದಲ್ಲವೇ? ಎಂಬ ಪ್ರಶ್ನೆ ನಿಮಗೂ ಬರಬಹುದು. ಆದರೆ ಎಂಜಿನಿಯರ್ಗಳು ಗಣಿತದ ಸರಳ ತತ್ವವನ್ನು ಬಳಸಿ ನಾಲ್ಕನೇ ಮೂಲೆಯನ್ನು ಖಾಲಿ ಬಿಟ್ಟಿದ್ದಾರೆ. ಗಣಿತದ ಪ್ರಕಾರ, ಯಾವುದೇ ದ್ವಿಮಾನ (2D) ಸಮತಲವನ್ನು ಅಥವಾ ವಸ್ತುವನ್ನು ಗುರುತಿಸಲು ಕೇವಲ ಮೂರು ಬಿಂದುಗಳು (Non-collinear points) ಸಾಕು. ಹೀಗಾಗಿ ನಾಲ್ಕನೇ ಚೌಕವನ್ನು ಸೇರಿಸುವುದು ಜಾಗದ ವ್ಯರ್ಥ ಬಳಕೆ ಹಾಗೂ ಅನಗತ್ಯ ಎನಿಸಿಕೊಳ್ಳುತ್ತದೆ.
ನಾಲ್ಕನೇ ಮೂಲೆಯನ್ನು ಖಾಲಿ ಬಿಡುವುದರಿಂದ ಸಿಗುವ ಜಾಗವನ್ನು ಕ್ಯೂಆರ್ ಕೋಡ್ನಲ್ಲಿ ಇತರ ಪ್ರಮುಖ ಕೆಲಸಗಳಿಗೆ ಬಳಸಲಾಗುತ್ತದೆ. ಅಲ್ಲಿ ಸ್ಕ್ಯಾನಿಂಗ್ ಪ್ರಕ್ರಿಯೆಯನ್ನು ಸಮಯಕ್ಕೆ ತಕ್ಕಂತೆ ಕಂಟ್ರೋಲ್ ಮಾಡುವ 'ಟೈಮಿಂಗ್ ಪ್ಯಾಟರ್ನ್', ಕ್ಯೂಆರ್ ಕೋಡ್ನ ಆವೃತ್ತಿಯನ್ನು ತಿಳಿಸುವ 'ವರ್ಷನ್ ಇನ್ಫರ್ಮೇಷನ್', ದೋಷಗಳನ್ನು ತಡೆದು ಮಾಹಿತಿಯನ್ನು ಸುರಕ್ಷಿತವಾಗಿಡುವ 'ಡೇಟಾ ಸ್ಟೋರೇಜ್' ಹಾಗೂ ಆ ಕ್ಯೂಆರ್ ಕೋಡ್ನಲ್ಲಿರುವ ಮೂಲ ಮಾಹಿತಿಯನ್ನು ಸಂಗ್ರಹಿಸಿಡಲಾಗುತ್ತದೆ. ಈ ರೀತಿ ಜಾಗವನ್ನು ದಕ್ಷತೆಯಿಂದ ಬಳಸುವುದರಿಂದ ಕ್ಯೂಆರ್ ಕೋಡ್ ಸಣ್ಣ ಗಾತ್ರದಲ್ಲಿದ್ದರೂ ಹೆಚ್ಚಿನ ಮಾಹಿತಿಯನ್ನು ಒಳಗೊಳ್ಳಲು ಸಾಧ್ಯವಾಗುತ್ತದೆ.
ಇದಲ್ಲದೆ, ದೊಡ್ಡ ಕ್ಯೂಆರ್ ಕೋಡ್ಗಳಲ್ಲಿ 'ಅಲೈನ್ಮೆಂಟ್ ಪ್ಯಾಟರ್ನ್' (Alignment Patterns) ಎಂಬ ಸಣ್ಣ ಸಣ್ಣ ಚೌಕಗಳಿರುವುದನ್ನು ನೀವು ಕಾಣಬಹುದು. ಇವು ಕ್ಯೂಆರ್ ಕೋಡ್ ಯಾವುದಾದರೂ ಬಾಟಲಿ ಅಥವಾ ಬಾಗಿದ ಮೇಲ್ಮೈಗಳ ಮೇಲಿದ್ದಾಗ, ಪ್ರಿಂಟಿಂಗ್ ಸರಿಯಾಗಿ ಆಗದೇ ಇದ್ದಾಗ ಅಥವಾ ಕ್ಯಾಮೆರಾವನ್ನು ಓರೆಯಾಗಿ ಹಿಡಿದಾಗ ಉಂಟಾಗುವ ಚಿತ್ರದ ವಿರೂಪತೆಯನ್ನು (Distortion) ತಡೆದು ನಿಖರವಾಗಿ ಸ್ಕ್ಯಾನ್ ಮಾಡಲು ನೆರವಾಗುತ್ತವೆ.
ಕ್ಯೂಆರ್ ಕೋಡ್ಗಳ ಅತ್ಯಂತ ಅದ್ಭುತವಾದ ವೈಶಿಷ್ಟ್ಯವೆಂದರೆ ಅದರ 'ಎರರ್ ಕರೆಕ್ಷನ್' (Error Correction) ಸಾಮರ್ಥ್ಯ. 'ರೀಡ್-ಸೊಲೊಮನ್' ಎಂಬ ಪ್ರಭಾವಿ ಆಲ್ಗರಿದಮ್ ಬಳಸಿ ಇದನ್ನು ರೂಪಿಸಲಾಗಿರುವುದರಿಂದ, ಕ್ಯೂಆರ್ ಕೋಡ್ ಹರಿದುಹೋಗಿದ್ದರೂ, ಕಲೆಯಾಗಿದ್ದರೂ, ಗೀಚಿದ್ದರೂ ಅಥವಾ ಶೇಕಡಾ 30 ರಷ್ಟು ಹಾನಿಗೊಳಗಾಗಿದ್ದರೂ ಸಹ ಸ್ಕ್ಯಾನರ್ ಮಾಹಿತಿಯನ್ನು ಯಶಸ್ವಿಯಾಗಿ ಓದುತ್ತದೆ. ಇದೇ ಕಾರಣಕ್ಕೆ ಕಂಪನಿಗಳು ಕ್ಯೂಆರ್ ಕೋಡ್ನ ಮಧ್ಯಭಾಗದಲ್ಲಿ ತಮ್ಮ ಲೋಗೋಗಳನ್ನು ಹಾಕಿದರೂ ಸಹ ಕೋಡ್ ಸ್ಕ್ಯಾನ್ ಆಗಲು ಯಾವುದೇ ತೊಂದರೆಯಾಗುವುದಿಲ್ಲ.
ಆರಂಭದಲ್ಲಿ ಅಂದರೆ 1994 ರಲ್ಲಿ 'ಡೆನ್ಸೋ ವೇವ್' (Denso Wave) ಎಂಬ ಜಪಾನಿ ಕಂಪನಿಯು ವಾಹನಗಳ ಬಿಡಿಭಾಗಗಳನ್ನು ಟ್ರ್ಯಾಕ್ ಮಾಡಲು ಈ ಕ್ಯೂಆರ್ ಕೋಡ್ ಅನ್ನು ಕಂಡುಹಿಡಿಯಿತು. ಆದರೆ ಇಂದು ಇದು ಜಾಗತಿಕ ಮಟ್ಟದಲ್ಲಿ ಅತ್ಯಂತ ಜನಪ್ರಿಯ ತಂತ್ರಜ್ಞಾನವಾಗಿದೆ. ಸಾಮಾನ್ಯ ಬಾರ್ಕೋಡ್ಗಳಿಗೆ ಹೋಲಿಸಿದರೆ ಕ್ಯೂಆರ್ ಕೋಡ್ಗಳು ವೆಬ್ಸೈಟ್ ಲಿಂಕ್ಗಳು, ಪಾವತಿ ಮಾಹಿತಿ, ವೈ-ಫೈ ಪಾಸ್ವರ್ಡ್, ಸಂಪರ್ಕ ವಿವರಗಳು ಮುಂತಾದ ಬೃಹತ್ ಪ್ರಮಾಣದ ಡೇಟಾವನ್ನು ಸಂಗ್ರಹಿಸಿಡಬಲ್ಲವು.
ನಮಗೆ ಸರಳವಾಗಿ ಕಾಣುವ ಕ್ಯೂಆರ್ ಕೋಡ್ನ ಹಿಂದೆ ಭಾರಿ ಗಣಿತ ಹಾಗೂ ಎಂಜಿನಿಯರಿಂಗ್ ಅಡಗಿದೆ. ಮೂರು ಮೂಲೆಗಳಲ್ಲಿರುವ ಕಪ್ಪು ಚೌಕಗಳು ಕೋಡ್ ಅನ್ನು ಯಾವುದೇ ಕೋನದಿಂದ ವೇಗವಾಗಿ ಗುರುತಿಸಲು ನೆರವಾದರೆ, ನಾಲ್ಕನೇ ಮೂಲೆಯನ್ನು ಖಾಲಿ ಬಿಟ್ಟು ಜಾಗವನ್ನು ಅತ್ಯಂತ ಬುದ್ಧಿವಂತಿಕೆಯಿಂದ ಬಳಸಿಕೊಳ್ಳಲಾಗಿದೆ. ಸರಳ ವಿನ್ಯಾಸ ಹಾಗೂ ಗರಿಷ್ಠ ಕಾರ್ಯಕ್ಷಮತೆಗೆ ಕ್ಯೂಆರ್ ಕೋಡ್ ತಂತ್ರಜ್ಞಾನವೇ ಅತ್ಯುತ್ತಮ ಉದಾಹರಣೆಯಾಗಿದೆ.
Comments
Please to leave a comment on this article.