ಆಪಲ್ ಹಿಂದಿಕ್ಕಿ ಮತ್ತೆ ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯ ಅಗ್ರಸ್ಥಾನಕ್ಕೇರಿದ ಸ್ಯಾಮ್‌ಸಂಗ್!!

ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ದೈತ್ಯ ಕಂಪನಿಗಳ ನಡುವಿನ ಪೈಪೋಟಿ ಎಂದಿಗೂ ಮುಗಿಯದ ಅಧ್ಯಾಯ. ಪ್ರಸಕ್ತ ವರ್ಷದ ಎರಡನೇ ತ್ರೈಮಾಸಿಕದಲ್ಲಿ (Q2) ಜಾಗತಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಭಾರಿ ಸಂಚಲನ ಉಂಟಾಗಿದ್ದು, ದಕ್ಷಿಣ ಕೊರಿಯಾದ ಹೆಮ್ಮೆಯ ತಂತ್ರಜ್ಞಾನ ದೈತ್ಯ ಸ್ಯಾಮ್‌ಸಂಗ್ ಎಲೆಕ್ಟ್ರಾನಿಕ್ಸ್ (Samsung Electronics) ತನ್ನ ಕಮರ್ಷಿಯಲ್ ವೈರಿ ಆಪಲ್ (Apple) ಕಂಪನಿಯನ್ನು ಹಿಂದಿಕ್ಕಿ ಮತ್ತೆ ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಅಗ್ರಸ್ಥಾನವನ್ನು ಮರಳಿ ಪಡೆದಿದೆ.

https://www.facebook.com/SamsungUK?__tn__=-UC*F

ಆದರೆ, ಈ ಯಶಸ್ಸು ಸುಲಭವಾಗಿ ಸಿಕ್ಕಿದ್ದಲ್ಲ. ಜಾಗತಿಕ ಮಟ್ಟದಲ್ಲಿ ಎದುರಾಗಿರುವ ಮೆಮೊರಿ ಚಿಪ್‌ಗಳ ತೀವ್ರ ಪೂರೈಕೆ ಕೊರತೆ ಮತ್ತು ದಾಖಲೆ ಮಟ್ಟದ ಬೆಲೆ ಏರಿಕೆಯ ನಡುವೆಯೇ ಈ ಮಹತ್ವದ ಬದಲಾವಣೆ ಸಂಭವಿಸಿದೆ. ಕೃತಕ ಬುದ್ಧಿಮತ್ತೆ (AI) ಡೇಟಾ ಸೆಂಟರ್‌ಗಳ ಅತಿಯಾದ ಬೇಡಿಕೆಯಿಂದಾಗಿ ಇಡೀ ಸ್ಮಾರ್ಟ್‌ಫೋನ್ ಉದ್ಯಮವು ತತ್ತರಿಸಿದ್ದು, ಒಟ್ಟಾರೆ ಜಾಗತಿಕ ಮೊಬೈಲ್ ರವಾನೆ (Shipments) 2013ರ ನಂತರದ ಅತ್ಯಂತ ಕನಿಷ್ಠ ಮಟ್ಟಕ್ಕೆ ಕುಸಿದಿದೆ.

ಮಾರುಕಟ್ಟೆ ಕುಸಿತಕ್ಕೆ ಪ್ರಮುಖ ಕಾರಣಗಳೇನು

'ದಿ ಕೊರಿಯಾ ಹೆರಾಲ್ಡ್' ಪತ್ರಿಕೆಯ ವರದಿಯ ಪ್ರಕಾರ, ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯು ವಾರ್ಷಿಕ ಆಧಾರದ ಮೇಲೆ (y-o-y) ಶೇಕಡಾ 11 ರಷ್ಟು ಭಾರಿ ಕುಸಿತವನ್ನು ಕಂಡಿದೆ. ಪ್ರಖ್ಯಾತ ಮಾರುಕಟ್ಟೆ ವಿಶ್ಲೇಷಣಾ ಸಂಸ್ಥೆಯಾದ 'ಕೌಂಟರ್‌ಪಾಯಿಂಟ್ ರಿಸರ್ಚ್' (Counterpoint Research) ಈ ಕುರಿತು ವರದಿ ನೀಡಿದ್ದು, DRAM ಮತ್ತು NAND ಫ್ಲ್ಯಾಶ್ ಮೆಮೊರಿಗಳ ತೀವ್ರ ಕೊರತೆಯೇ ಈ ಹಿನ್ನಡೆಗೆ ಮುಖ್ಯ ಕಾರಣ ಎಂದು ತಿಳಿಸಿದೆ.

ಪ್ರಸ್ತುತ ಜಗತ್ತಿನಾದ್ಯಂತ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ತಂತ್ರಜ್ಞಾನದ ಅಲೆ ಎದ್ದಿರುವುದರಿಂದ, ಚಿಪ್ ತಯಾರಕ ಕಂಪನಿಗಳು ಸ್ಮಾರ್ಟ್‌ಫೋನ್‌ಗಳಿಗಿಂತ ಹೆಚ್ಚಾಗಿ AI ಡೇಟಾ ಸೆಂಟರ್‌ಗಳಿಗೆ ಅಗತ್ಯವಿರುವ ಹೈ-ಎಂಡ್ ಚಿಪ್‌ಗಳ ತಯಾರಿಕೆಗೆ ಮೊದಲ ಆದ್ಯತೆ ನೀಡುತ್ತಿವೆ. ಇದರಿಂದಾಗಿ ಸ್ಮಾರ್ಟ್‌ಫೋನ್ ಉದ್ಯಮಕ್ಕೆ ಸಿಗಬೇಕಾದ ಮೆಮೊರಿ ಚಿಪ್‌ಗಳ ಪೂರೈಕೆಯಲ್ಲಿ ಭಾರಿ ವ್ಯತ್ಯಯವಾಗಿದೆ.

ಉತ್ಪಾದನಾ ವೆಚ್ಚದ ತಲ್ಲಣ

ಪ್ರಸ್ತುತ ಪರಿಸ್ಥಿತಿಯಲ್ಲಿ ಕೆಲವು ಬಜೆಟ್ ಸ್ಮಾರ್ಟ್‌ಫೋನ್‌ಗಳ ಒಟ್ಟು ಉತ್ಪಾದನಾ ವೆಚ್ಚದಲ್ಲಿ ಮೆಮೊರಿ ಮತ್ತು ಸ್ಟೋರೇಜ್ ಘಟಕಗಳ ಪಾಲು ಶೇಕಡಾ 60 ಕ್ಕಿಂತ ಹೆಚ್ಚಾಗಿದೆ! ಇನ್ನು ಪ್ರೀಮಿಯಂ ಮಾದರಿಯ ಫೋನ್‌ಗಳಲ್ಲಿ ಇದು ಶೇಕಡಾ 30 ಕ್ಕಿಂತ ಅಧಿಕವಾಗಿದೆ. ಕೆಲವು ಮೊಬೈಲ್ ತಯಾರಕರಿಗೆ ಮೆಮೊರಿ ವೆಚ್ಚವು ಕಳೆದ ವರ್ಷಕ್ಕೆ ಹೋಲಿಸಿದರೆ 4 ರಿಂದ 5 ಪಟ್ಟು ಹೆಚ್ಚಾಗಿದೆ.

ಸ್ಯಾಮ್‌ಸಂಗ್ ವರ್ಸಸ್ ಆಪಲ್

ಕೌಂಟರ್‌ಪಾಯಿಂಟ್ ರಿಸರ್ಚ್ ಬಿಡುಗಡೆ ಮಾಡಿರುವ ಪ್ರಾಥಮಿಕ ಅಂಕಿ-ಅಂಶಗಳ ಪ್ರಕಾರ, ಜಾಗತಿಕ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಸ್ಯಾಮ್‌ಸಂಗ್ ಶೇಕಡಾ 24 ರಷ್ಟು ಪಾಲನ್ನು ಹೊಂದುವ ಮೂಲಕ ಮೊದಲ ಸ್ಥಾನಕ್ಕೇರಿದೆ. ಮೊದಲ ತ್ರೈಮಾಸಿಕದಲ್ಲಿ (Q1) ಆಪಲ್ ಕಂಪನಿಯು ಶೇಕಡಾ 21 ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದುವ ಮೂಲಕ ಮೊದಲ ಸ್ಥಾನದಲ್ಲಿತ್ತು ಮತ್ತು ಸ್ಯಾಮ್‌ಸಂಗ್ ಶೇಕಡಾ 20 ರಷ್ಟು ಪಾಲು ಹೊಂದಿತ್ತು. ಆದರೆ ಎರಡನೇ ತ್ರೈಮಾಸಿಕದಲ್ಲಿ ಆಪಲ್ ಶೇಕಡಾ 20 ಕ್ಕೆ ಕುಸಿದಿದ್ದು, ಸ್ಯಾಮ್‌ಸಂಗ್ ಅಗ್ರಸ್ಥಾನವನ್ನು ವಶಪಡಿಸಿಕೊಂಡಿದೆ.

ಮತ್ತೊಂದು ಪ್ರಮುಖ ಸಂಶೋಧನಾ ಸಂಸ್ಥೆಯಾದ 'ಓಮ್ಡಿಯಾ' (Omdia) ನೀಡಿರುವ ದತ್ತಾಂಶದ ಪ್ರಕಾರವೂ ಸ್ಯಾಮ್‌ಸಂಗ್ ಶೇಕಡಾ 22 ರಷ್ಟು ಮಾರುಕಟ್ಟೆ ಪಾಲಿನೊಂದಿಗೆ ಪ್ರಥಮ ಸ್ಥಾನದಲ್ಲಿದ್ದರೆ, ಆಪಲ್ ಶೇಕಡಾ 20 ರಷ್ಟು ಪಾಲಿನೊಂದಿಗೆ ದ್ವಿತೀಯ ಸ್ಥಾನದಲ್ಲಿದೆ.

ಸ್ಯಾಮ್‌ಸಂಗ್ ಯಶಸ್ಸಿನ ರಹಸ್ಯ ಮತ್ತು ಆಪಲ್‌ನ ಸ್ಥಿರತೆ

ಹೆಚ್ಚುತ್ತಿರುವ ಬಿಡಿಭಾಗಗಳ ಬೆಲೆಯಿಂದಾಗಿ ಗ್ರಾಹಕರ ಬೇಡಿಕೆ ಕುಗ್ಗಿದ್ದರೂ, ಸ್ಯಾಮ್‌ಸಂಗ್ ಕೆಲವು ಕಾರ್ಯತಂತ್ರಗಳ ಮೂಲಕ ಮಾರುಕಟ್ಟೆಯನ್ನು ತನ್ನತ್ತ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.

ಭಾರತ ಮತ್ತು ಪಶ್ಚಿಮ ಏಷ್ಯಾ ಮಾರುಕಟ್ಟೆ: ಸ್ಯಾಮ್‌ಸಂಗ್ ಭಾರತ ಮತ್ತು ಪಶ್ಚಿಮ ಏಷ್ಯಾದ ದೇಶಗಳಲ್ಲಿ ಬೆಲೆ ಏರಿಕೆಯನ್ನು ನಿಯಂತ್ರಣದಲ್ಲಿಟ್ಟುಕೊಂಡು, ಆಕ್ರಮಣಕಾರಿ ಪ್ರಚಾರಗಳು ಮತ್ತು ಆಫರ್‌ಗಳನ್ನು ನೀಡಿತು.

ಗ್ಯಾಲಕ್ಸಿ S26 ಸರಣಿಯ ಮ್ಯಾಜಿಕ್: ಇತ್ತೀಚೆಗೆ ಬಿಡುಗಡೆಯಾದ ಸ್ಯಾಮ್‌ಸಂಗ್ ಗ್ಯಾಲಕ್ಸಿ S26 (Galaxy S26) ಸರಣಿಯ ಸ್ಮಾರ್ಟ್‌ಫೋನ್‌ಗಳು ಭರ್ಜರಿ ಮಾರಾಟ ಕಂಡಿವೆ. ವಿಶೇಷವಾಗಿ 'ಗ್ಯಾಲಕ್ಸಿ S26 ಅಲ್ಟ್ರಾ' ಮಾದರಿಯು ತನ್ನ ಅತ್ಯಾಧುನಿಕ ಪ್ರೈವೆಸಿ ಡಿಸ್ಪ್ಲೇ ಮತ್ತು ಸುಧಾರಿತ AI ಫೀಚರ್‌ಗಳಿಂದಾಗಿ ಗ್ರಾಹಕರ ನೆಚ್ಚಿನ ಫೋನ್ ಆಗಿದೆ.

ಮತ್ತೊಂದೆಡೆ, ಆಪಲ್ ಕಂಪನಿಯ ರವಾನೆ ಪ್ರಮಾಣವು ವಾರ್ಷಿಕವಾಗಿ ಶೇಕಡಾ 3 ರಷ್ಟು ಅತ್ಯಲ್ಪ ಪ್ರಗತಿ ಕಂಡಿದೆ. ಐಫೋನ್ 17 (iPhone 17) ಸರಣಿಯ ಸ್ಥಿರ ಬೇಡಿಕೆ ಮತ್ತು ಇತರ ಬ್ರ್ಯಾಂಡ್‌ಗಳಂತೆ ಆಪಲ್ ತನ್ನ ಫೋನ್‌ಗಳ ಬೆಲೆಯನ್ನು ತಕ್ಷಣವೇ ಹೆಚ್ಚಿಸದೆ ಸ್ಥಿರವಾಗಿ ಕಾಯ್ದುಕೊಂಡಿದ್ದು ಅದಕ್ಕೆ ಪ್ಲಸ್ ಪಾಯಿಂಟ್ ಆಗಿದೆ.

ಸ್ಮಾರ್ಟ್‌ಫೋನ್‌ಗಳ ಬೆಲೆ ಏರಿಕೆ ಗ್ರಾಫ್

ಉತ್ಪಾದನಾ ವೆಚ್ಚ ಭರಿಸಲಾಗದೆ ಅಂತಿಮವಾಗಿ ಎಲ್ಲಾ ಪ್ರಮುಖ ಟೆಕ್ ಕಂಪನಿಗಳು ತಮ್ಮ ಉತ್ಪನ್ನಗಳ ಬೆಲೆಯನ್ನು ಸದ್ದಿಲ್ಲದೆ ಹೆಚ್ಚಿಸುತ್ತಿವೆ.

ಸ್ಯಾಮ್‌ಸಂಗ್: ಫೆಬ್ರವರಿಯಲ್ಲಿ ಬಿಡುಗಡೆಯಾದ ಗ್ಯಾಲಕ್ಸಿ S26 ಸರಣಿಯ ಬೆಲೆಯನ್ನು ಹೆಚ್ಚಿಸುವ ಮೂಲಕ ಸ್ಯಾಮ್‌ಸಂಗ್ ತನ್ನ ಹಲವು ವರ್ಷಗಳ ಬೆಲೆ ಸ್ಥಿರತೆಯ ನೀತಿಯನ್ನು ಕೈಬಿಟ್ಟಿತು. ಅಲ್ಲದೆ, ಏಪ್ರಿಲ್ ತಿಂಗಳಲ್ಲಿ ಕೊರಿಯಾ ಮಾರುಕಟ್ಟೆಯಲ್ಲಿ ತನ್ನ 512-GB ಸಾಮರ್ಥ್ಯದ ಗ್ಯಾಲಕ್ಸಿ Z Fold7 ಮತ್ತು Flip7 ಫೋನ್‌ಗಳ ಬೆಲೆಯನ್ನು ಬರೋಬ್ಬರಿ 94,600 ವೋನ್ (ಸುಮಾರು $64 ಅಥವಾ ₹5,300) ಹೆಚ್ಚಿಸಿದೆ. ಮಾರುಕಟ್ಟೆಗೆ ಬಂದು ಒಂದು ವರ್ಷವೂ ಆಗದ ಫೋನ್‌ಗಳ ಬೆಲೆ ಹೆಚ್ಚಿಸಿದ್ದು ತಜ್ಞರ ಆಶ್ಚರ್ಯಕ್ಕೆ ಕಾರಣವಾಗಿದೆ.

ಆಪಲ್: ಆಪಲ್ ಕಂಪನಿಯು ಜೂನ್ ತಿಂಗಳಲ್ಲಿ ತನ್ನ ಕೆಲವು ಮ್ಯಾಕ್‌ಬುಕ್ (MacBook) ಮತ್ತು ಐಪ್ಯಾಡ್ (iPad) ಮಾದರಿಗಳ ಬೆಲೆಯನ್ನು $100 ರಿಂದ $300 ರವರೆಗೆ ಹೆಚ್ಚಿಸಿದೆ.

ಚೀನಾ ಬ್ರ್ಯಾಂಡ್‌ಗಳು: ಅಗ್ಗದ ಬೆಲೆಗೆ ಹೆಸರುವಾಸಿಯಾಗಿದ್ದ ವಿವೋ, ಒಪ್ಪೋ ಮತ್ತು ಶಿಯೋಮಿ ಕಂಪನಿಗಳು ಸಹ ಅನಿವಾರ್ಯವಾಗಿ ತಮ್ಮ ಫೋನ್‌ಗಳ ಬೆಲೆಯನ್ನು 100 ಯುವಾನ್‌ನಿಂದ 500 ಯುವಾನ್ ($14 ರಿಂದ $70) ವರೆಗೆ ಹೆಚ್ಚಿಸಿವೆ.

ಬಿಕ್ಕಟ್ಟು ಸದ್ಯಕ್ಕಿಲವೇ

ಸ್ಮಾರ್ಟ್‌ಫೋನ್ ಮಾರುಕಟ್ಟೆಯ ಈ ಕಠಿಣ ಪರಿಸ್ಥಿತಿ ಸದ್ಯಕ್ಕೆ ಸುಧಾರಿಸುವ ಲಕ್ಷಣಗಳು ಕಾಣಿಸುತ್ತಿಲ್ಲ ಎಂದು ಮಾರುಕಟ್ಟೆ ವಿಶ್ಲೇಷಕರು ಎಚ್ಚರಿಸಿದ್ದಾರೆ. ವರ್ಷದ ದ್ವಿತೀಯಾರ್ಧದಲ್ಲಿ ಬರಲಿರುವ ಹಬ್ಬದ ದಿನಗಳು ಮತ್ತು ಪ್ರಮುಖ ಹೊಸ ಫೋನ್‌ಗಳ ಬಿಡುಗಡೆಯ ಅವಧಿಯಲ್ಲಿ ಈ ಕುಸಿತ ಮತ್ತಷ್ಟು ತೀವ್ರಗೊಳ್ಳಬಹುದು ಎನ್ನಲಾಗಿದೆ.

ಓಮ್ಡಿಯಾ ಸಂಸ್ಥೆಯ ಸಂಶೋಧನಾ ವ್ಯವಸ್ಥಾಪಕರಾದ ಲೀ ಕ್ಸುವಾನ್ ಚೀವ್ ಅವರ ಪ್ರಕಾರ, "ಸ್ಮಾರ್ಟ್‌ಫೋನ್ ತಯಾರಕರು ಶೀಘ್ರದಲ್ಲೇ ಮಾರುಕಟ್ಟೆ ಸರಿಹೋಗಬಹುದು ಎಂಬ ನಿರೀಕ್ಷೆಯಲ್ಲಿದ್ದಾರೆ. ಆದರೆ ಮೆಮೊರಿ ಚಿಪ್‌ಗಳ ಬೆಲೆಗಳು 2027ರ ದ್ವಿತೀಯಾರ್ಧಕ್ಕಿಂತ ಮುಂಚಿತವಾಗಿ ಕುಸಿಯುವ ಸಾಧ್ಯತೆಯೇ ಇಲ್ಲ. ಒಂದು ವೇಳೆ ಬೆಲೆ ಇಳಿಕೆಯಾದರೂ, ಅವು 2025ಕ್ಕಿಂತ ಮುಂಚೆ ಇದ್ದಷ್ಟು ಅಗ್ಗವಾಗುವುದು ಅನುಮಾನ."