ರಾಡಿಕೊ ಕೈತಾನ್ ಬರ್ಜರಿ ಪ್ರದರ್ಶನ - ನಿವ್ವಳ ಲಾಭದಲ್ಲಿ ಶೇಕಡಾ 76ರಷ್ಟು ಭರ್ಜರಿ ಜಿಗಿತ!!

ಭಾರತದ ಪ್ರಮುಖ ಮದ್ಯ ತಯಾರಿಕಾ ಕಂಪನಿಗಳಲ್ಲಿ ಒಂದಾದ ರಾಡಿಕೊ ಕೈತಾನ್ ಲಿಮಿಟೆಡ್ (Radico Khaitan Ltd.), 2027ನೇ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ (Q1 FY27) ಅತ್ಯುತ್ತಮ ಹಣಕಾಸು ಫಲಿತಾಂಶಗಳನ್ನು ಹೊರಹಾಕುವ ಮೂಲಕ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸಿದೆ. ಜೂನ್ 30, 2026ಕ್ಕೆ ಕೊನೆಗೊಂಡ ಈ ತ್ರೈಮಾಸಿಕದಲ್ಲಿ ಕಂಪನಿಯ ಕನ್ಸೋಲಿಡೇಟೆಡ್ ನಿವ್ವಳ ಲಾಭವು ಬರ್ಜರಿ ಶೇಕಡಾ 76ರಷ್ಟು ಜಿಗಿದಿದ್ದು, ಹೂಡಿಕೆದಾರರ ಮೊಗದಲ್ಲಿ ಮಂದಹಾಸ ಮೂಡಿಸಿದೆ.

ಆರೋಗ್ಯಕರ ಕಂದಾಯ ಬೆಳವಣಿಗೆ, ಕಾರ್ಯಾಚರಣೆಯ ಅಂಚಿನಲ್ಲಿ (Operating Margins) ಸುಧಾರಣೆ ಹಾಗೂ ಪ್ರೀಮಿಯಂ ಮದ್ಯ ವಿಭಾಗದಲ್ಲಿ ನಿರಂತರ ಮಾರಾಟ ಹೆಚ್ಚಳವೇ ಈ ಭರ್ಜರಿ ಯಶಸ್ಸಿಗೆ ಮುಖ್ಯ ಕಾರಣವಾಗಿದೆ. ಪ್ರಥಮ ತ್ರೈಮಾಸಿಕದ ಹಣಕಾಸು ಫಲಿತಾಂಶಗಳ ಪ್ರಕಾರ, ರಾಡಿಕೊ ಕೈತಾನ್ ಕಂಪನಿಯ ನಿವ್ವಳ ಲಾಭವು 230 ಕೋಟಿ ರೂಪಾಯಿಗೆ ತಲುಪಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಕಂಪನಿಯು 131 ಕೋಟಿ ರೂಪಾಯಿ ಲಾಭ ಗಳಿಸಿತ್ತು. ಉತ್ತಮ ಕಾರ್ಯಾಚರಣಾ ದಕ್ಷತೆ ಮತ್ತು ಪ್ರೀಮಿಯಂ ಬ್ರ್ಯಾಂಡ್‌ಗಳಿಂದ ಬಂದ ಹೆಚ್ಚಿನ ಕೊಡುಗೆಯು ಈ ಬೃಹತ್ ಲಾಭಕ್ಕೆ ಕಾರಣವಾಗಿದೆ.

ಇನ್ನು ಅಬಕಾರಿ ಸುಂಕವನ್ನು ಹೊರತುಪಡಿಸಿ ಕಾರ್ಯಾಚರಣೆಯಿಂದ ಬಂದ ಆದಾಯವು ಶೇಕಡಾ 11.7ರಷ್ಟು ಏರಿಕೆಯಾಗಿ 1,684 ಕೋಟಿ ರೂಪಾಯಿಗೆ ಮುಟ್ಟಿದೆ. ಹಿಂದಿನ ವರ್ಷ ಇದು 1,507 ಕೋಟಿ ರೂಪಾಯಿ ಇತ್ತು. ಆದಾಯದ ಬೆಳವಣಿಗೆಯು ಕಡಿಮೆ ದ್ವಿತೀಯಂಕದಲ್ಲಿದ್ದರೂ (Low double digits), ಕಂಪನಿಯು ಉತ್ಪನ್ನಗಳ ಮಿಶ್ರಣ, ಬೆಲೆ ನಿಗದಿ ಮತ್ತು ವೆಚ್ಚ ನಿರ್ವಹಣೆಯ ಮೂಲಕ ಹೆಚ್ಚಿನ ಲಾಭದಾಯಕತೆಯನ್ನು ಸಾಧಿಸಿದೆ.

ಕಂಪನಿಯ ಹಣಕಾಸು ಸಾಧನೆಯ ಮತ್ತೊಂದು ಪ್ರಮುಖ ಮುಖ್ಯಾಂಶವೆಂದರೆ ಅದರ ಎಬಿಟಿಡಿಎ (EBITDA) ಬೆಳವಣಿಗೆ. ರಾಡಿಕೊ ಕೈತಾನ್ ಕಂಪನಿಯ ಎಬಿಟಿಡಿಎ ಶೇಕಡಾ 50.3ರಷ್ಟು ಜಿಗಿದು 349 ಕೋಟಿ ರೂಪಾಯಿಗೆ ತಲುಪಿದೆ. ಹಿಂದಿನ ವರ್ಷದ ಇದೇ ತ್ರೈಮಾಸಿಕದಲ್ಲಿ ಇದು 232.2 ಕೋಟಿ ರೂಪಾಯಿ ಮಾತ್ರವಿತ್ತು. ಕಾರ್ಯಾಚರಣೆಯ ಸುಧಾರಣೆ, ಪ್ರೀಮಿಯರೀಕರಣ ಮತ್ತು ಕಟ್ಟುನಿಟ್ಟಿನ ವೆಚ್ಚ ನಿಯಂತ್ರಣದಿಂದಾಗಿ ಈ ಭಾರೀ ಏರಿಕೆ ಸಾಧ್ಯವಾಗಿದೆ.

ಇದರೊಂದಿಗೆ ಕಂಪನಿಯ ಎಬಿಟಿಡಿಎ ಮಾರ್ಜಿನ್ ಕೂಡ ಶೇಕಡಾ 15.4ರಿಂದ ಶೇಕಡಾ 20.7ಕ್ಕೆ ಗಮನಾರ್ಹವಾಗಿ ಸುಧಾರಿಸಿದೆ. ಇದು ಮಾರುಕಟ್ಟೆಯಲ್ಲಿ ರಾಡಿಕೊ ಕೈತಾನ್ ಬ್ರ್ಯಾಂಡ್‌ಗಳಿಗೆ ಇರುವ ಭಾರಿ ಬೇಡಿಕೆಯನ್ನು ಎತ್ತಿ ತೋರಿಸುತ್ತದೆ. ಕಂಪನಿಯ ಪ್ರಥಮ ತ್ರೈಮಾಸಿಕದ ಪ್ರಮುಖ ಮುಖ್ಯಾಂಶಗಳನ್ನು ನೋಡುವುದಾದರೆ: ನಿವ್ವಳ ಲಾಭ 230 ಕೋಟಿ ರೂ. (ಶೇಕಡಾ 76 ಏರಿಕೆ), ಆದಾಯ 1,684 ಕೋಟಿ ರೂ. (ಶೇಕಡಾ 11.7 ಏರಿಕೆ), ಎಬಿಟಿಡಿಎ 349 ಕೋಟಿ ರೂ. (ಶೇಕಡಾ 50.3 ಏರಿಕೆ), ಮತ್ತು ಎಬಿಟಿಡಿಎ ಮಾರ್ಜಿನ್ ಶೇಕಡಾ 20.7ಕ್ಕೆ ಏರಿಕೆಯಾಗಿದೆ.

ಮಾರುಕಟ್ಟೆಯಲ್ಲಿ ಈ ಅದ್ಭುತ ಫಲಿತಾಂಶಗಳು ಹೊರಬೀಳುತ್ತಿದ್ದಂತೆ ಹೂಡಿಕೆದಾರರು ಸಕಾರಾತ್ಮಕವಾಗಿ ಸ್ಪಂದಿಸಿದ್ದು, ಮಂಗಳವಾರ ಕಂಪನಿಯ ಷೇರು ಮೌಲ್ಯವು ಶೇಕಡಾ 3ಕ್ಕಿಂತ ಹೆಚ್ಚು ಏರಿಕೆ ಕಂಡಿತು. ಆರಂಭಿಕ ಕುಸಿತದಿಂದ ಚೇತರಿಸಿಕೊಂಡ ಷೇರು ಬೆಲೆಯು 4,283.90 ರೂಪಾಯಿ ಗರಿಷ್ಠ ಮಟ್ಟವನ್ನು ಮುಟ್ಟಿ, ಅಂತಿಮವಾಗಿ 4,253.50 ರೂಪಾಯಿಯಲ್ಲಿ ಸ್ಥಿರವಾಯಿತು.

ಕಳೆದ ಒಂದು ವರ್ಷದಿಂದ ಭಾರತದ ಮದ್ಯದ ಸ್ಟಾಕ್‌ಗಳಲ್ಲಿ ರಾಡಿಕೊ ಕೈತಾನ್ ಅತ್ಯುತ್ತಮ ಪ್ರದರ್ಶನ ನೀಡುತ್ತಿರುವ ಕಂಪನಿಯಾಗಿದೆ. ಕಳೆದ 12 ತಿಂಗಳುಗಳಲ್ಲಿ ಈ ಸ್ಟಾಕ್ ಶೇಕಡಾ 59.48ರಷ್ಟು ಲಾಭ ತಂದುಕೊಟ್ಟಿದ್ದರೆ, 2026ರ ಆರಂಭದಿಂದ ಇಲ್ಲಿವರೆಗೆ ಶೇಕಡಾ 29.43ರಷ್ಟು ಏರಿಕೆ ದಾಖಲಿಸಿದೆ. ನಿರಂತರ ಪ್ರೀಮಿಯರೀಕರಣ, ವಿತರಣಾ ಜಾಲದ ವಿಸ್ತರಣೆ ಮತ್ತು ಅತ್ಯುತ್ತಮ ಉತ್ಪನ್ನಗಳ ಪೋರ್ಟ್‌ಫೋಲಿಯೊ ಕಂಪನಿಯ ಯಶಸ್ಸಿಗೆ ಬೆನ್ನೆಲುಬಾಗಿದೆ.

ಬ್ಲೂಮ್‌ಬರ್ಗ್ ದತ್ತಾಂಶದ ಪ್ರಕಾರ ವಿಶ್ಲೇಷಕರು ಕೂಡ ಈ ಸ್ಟಾಕ್ ಬಗ್ಗೆ ಅತ್ಯಂತ ಸಕಾರಾತ್ಮಕ ಅಭಿಪ್ರಾಯ ಹೊಂದಿದ್ದು, 25 ವಿಶ್ಲೇಷಕರ ಪೈಕಿ 21 ಮಂದಿ 'ಖರೀದಿ' (Buy) ಶಿಫಾರಸು ಮಾಡಿದ್ದಾರೆ. 3 ಮಂದಿ 'ಹೋಲ್ಡ್' ಎಂದರೆ, ಕೇವಲ 1 ಮಂದಿ ಮಾತ್ರ 'ಮಾರಾಟ' ಮಾಡಲು ಸಲಹೆ ನೀಡಿದ್ದಾರೆ. ರಾಡಿಕೊ ಕೈತಾನ್‌ನ Q1 FY27 ಫಲಿತಾಂಶಗಳು ಭಾರತದ ಪ್ರೀಮಿಯಂ ಸ್ಪಿರಿಟ್ಸ್ ಮಾರುಕಟ್ಟೆಯಲ್ಲಿ ಕಂಪನಿಯ ಬಲವಾದ ಹಿಡಿತವನ್ನು ಸಾಬೀತುಪಡಿಸಿವೆ.

ವ್ಯವಹಾರದ ಮೇಲಿನ ವಿಶ್ವಾಸದಿಂದಾಗಿ ಕಂಪನಿಯು ತನ್ನ ವಾಲ್ಯೂಮ್ ಬೆಳವಣಿಗೆಯ ಮುನ್ನೋಟವನ್ನು ಶೇಕಡಾ 25ಕ್ಕಿಂತ ಹೆಚ್ಚಿಗೆ ಪರಿಷ್ಕರಿಸಿದೆ. ಮುಂಬರುವ ದಿನಗಳಲ್ಲಿ ಪ್ರೀಮಿಯಂ ಮದ್ಯದ ಬೇಡಿಕೆ ಹೆಚ್ಚಾಗುವ ನಿರೀಕ್ಷೆಯಿದ್ದು, ಇದೇ ಆವೇಗವನ್ನು ಮುಂದುವರಿಸುವ ಮೂಲಕ ರಾಡಿಕೊ ಕೈತಾನ್ ಪ್ರಸಕ್ತ ಹಣಕಾಸು ವರ್ಷದಲ್ಲಿ ಮತ್ತಷ್ಟು ಅದ್ಭುತ ಸಾಧನೆ ಮಾಡುವ ಎಲ್ಲಾ ಲಕ್ಷಣಗಳು ಗೋಚರಿಸುತ್ತಿವೆ.