3 ವರ್ಷಗಳಲ್ಲಿ ಡಿಗ್ರಿ ಸರ್ಟಿಫಿಕೇಟ್‌ಗಳು ಕಸದ ಕಾಗದವಾಗಲಿವೆ - ಶಿಕ್ಷಣ ವ್ಯವಸ್ಥೆಗೆ ಎಐ ಕಂಟಕ!!

ಟೆಕ್ ದಿಗಿಜ ಹಾಗೂ ಬಿಲಿಯನೇರ್ ಇಲಾನ್ ಮಸ್ಕ್ (Elon Musk), ಕೃತಕ ಬುದ್ಧಿಮತ್ತೆ (AI), ರೊಬೊಟಿಕ್ಸ್ ಮತ್ತು ಜಾಗತಿಕ ಆರ್ಥಿಕತೆಯ ಭವಿಷ್ಯದ ಕುರಿತು ಮತ್ತೊಂದು ಸರಣಿ ಭವಿಷ್ಯ ನುಡಿಯುವ ಮೂಲಕ ಜಾಗತಿಕ ವಲಯದಲ್ಲಿ ಭಾರಿ ಸಂಚಲನ ಮೂಡಿಸಿದ್ದಾರೆ. ಮುಂಬರುವ 2030 ರ ವೇಳೆಗೆ ಮಾನವ ಸಮಾಜವು ತಂತ್ರಜ್ಞಾನದ ಒಂದು ಅಭೂತಪೂರ್ವ ತಿರುವನ್ನು ತಲುಪಲಿದ್ದು, ಎಐ ಮತ್ತು ಹ್ಯೂಮನಾಯ್ಡ್ ರೊಬೊಟ್‌ಗಳು (Humanoid Robots) ಶಿಕ್ಷಣ, ಆರೋಗ್ಯ, ಹಣಕಾಸು ಹಾಗೂ ಉತ್ಪಾದನಾ ವಲಯ ಸೇರಿದಂತೆ ಪ್ರತಿಯೊಂದು ಕ್ಷೇತ್ರವನ್ನೂ ಸಂಪೂರ್ಣವಾಗಿ ಬದಲಾಯಿಸಲಿವೆ ಎಂದು ಮಸ್ಕ್ ದೃಢವಾಗಿ ನಂಬಿದ್ದಾರೆ.

ಮಸ್ಕ್ ಅವರ ಈ ಹೊಸ ಮುನ್ನೋಟಗಳ ಪೈಕಿ ಅತ್ಯಂತ ಗಮನಾರ್ಹವಾದುದೆಂದರೆ ಸಾಂಪ್ರದಾಯಿಕ ಶಿಕ್ಷಣ ವ್ಯವಸ್ಥೆಯ ಕುರಿತಾದ ಹೇಳಿಕೆ. ಮುಂದಿನ ಕೇವಲ ಮೂರು ವರ್ಷಗಳಲ್ಲಿ ಸಾಂಪ್ರದಾಯಿಕ ವಿಶ್ವವಿದ್ಯಾಲಯಗಳ ಪದವಿಗಳು (University Degrees) ತಮ್ಮ ನೈಜ ಮೌಲ್ಯವನ್ನು ಕಳೆದುಕೊಳ್ಳಲಿವೆ ಎಂದು ಮಸ್ಕ್ ಹೇಳಿದ್ದಾರೆ. ಎಐ ವ್ಯವಸ್ಥೆಗಳು ಜಗತ್ತಿನಲ್ಲಿ ಎಷ್ಟು ವೇಗವಾಗಿ ಮುನ್ನಡೆಯುತ್ತಿವೆ ಎಂದರೆ, ಮುಂಬರುವ ದಿನಗಳಲ್ಲಿ ಕೇವಲ ಕಾಗದದ ಪದವಿ ಪತ್ರಗಳಿಗಿಂತ ಪ್ರಾಯೋಗಿಕ ಜ್ಞಾನ, ಸೃಜನಶೀಲತೆ ಮತ್ತು ಬುದ್ಧಿವಂತ ಯಂತ್ರಗಳೊಂದಿಗೆ ಕೆಲಸ ಮಾಡುವ ಸಾಮರ್ಥ್ಯಕ್ಕೆ ಹೆಚ್ಚಿನ ಮೌಲ್ಯ ಸಿಗಲಿದೆ. ಯಾವುದೇ ಅತ್ಯುನ್ನತ ಜ್ಞಾನವನ್ನು ಎಐ ಕೇವಲ ಕೆಲವೇ ನಿಮಿಷಗಳಲ್ಲಿ ಒದಗಿಸಬಲ್ಲದಾದರೆ, ಉದ್ಯೋಗದಾತರು ಪದವಿಗಳ ಬದಲಿಗೆ ವ್ಯಕ್ತಿಯ ಹೊಂದಾಣಿಕೆಯ ಗುಣ ಮತ್ತು ನೈಜ ಕೌಶಲ್ಯಗಳನ್ನು ಮಾತ್ರ ಆಧರಿಸಿ ಕೆಲಸ ನೀಡಲಿದ್ದಾರೆ.

ಕಾನೂನು ಮತ್ತು ಹಣಕಾಸು ವಲಯದಲ್ಲಿ ಭಾರಿ ಕ್ರಾಂತಿ

ಇಲಾನ್ ಮಸ್ಕ್ ಅವರ ಪ್ರಕಾರ, ಕಾನೂನು ಮತ್ತು ಹಣಕಾಸು ಉದ್ಯಮಗಳು ಮುಂದಿನ ದಿನಗಳಲ್ಲಿ ತೀವ್ರ ಸ್ವರೂಪದ ಬದಲಾವಣೆಗಳಿಗೆ ಒಳಗಾಗಲಿವೆ. ಎಐ ಚಾಲಿತ ಅತ್ಯಾಧುನಿಕ ವ್ಯವಸ್ಥೆಗಳು ಕಠಿಣವಾದ ಕಾನೂನು ಒಪ್ಪಂದಗಳನ್ನು ವಿಶ್ಲೇಷಿಸಲು, ನ್ಯಾಯಾಲಯದ ದಾಖಲೆಗಳನ್ನು ಸಿದ್ಧಪಡಿಸಲು, ಜಾಣತನದ ಹೂಡಿಕೆ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಮತ್ತು ಸಂಕೀರ್ಣವಾದ ಹಣಕಾಸು ಮಾದರಿಗಳನ್ನು ಕೇವಲ ಸೆಕೆಂಡುಗಳಲ್ಲಿ ರಚಿಸಲು ಶಕ್ತವಾಗಲಿವೆ. ಈ ಹೊಸ ಆವಿಷ್ಕಾರಗಳು ಉದ್ಯಮಗಳಲ್ಲಿ ಕಾರ್ಯಕ್ಷಮತೆಯನ್ನು ಹೆಚ್ಚಿಸಿ, ಕಾರ್ಯಾಚರಣೆಯ ವೆಚ್ಚವನ್ನು ಗಣನೀಯವಾಗಿ ಕಡಿಮೆ ಮಾಡಲಿದ್ದರೂ, ಇದೇ ವಲಯಗಳಲ್ಲಿ ಸದ್ಯ ಇರುವ ಲಕ್ಷಾಂತರ ಸಾಂಪ್ರದಾಯಿಕ ಉದ್ಯೋಗಗಳಿಗೆ ದೊಡ್ಡ ಕಂಟಕವನ್ನು ತರಲಿವೆ.

ಆರೋಗ್ಯ ವಲಯ ಮತ್ತು ಸ್ವಯಂಚಾಲಿತ ರೊಬೊಟಿಕ್ ಸರ್ಜರಿ

ಆರೋಗ್ಯ ಕ್ಷೇತ್ರವೂ ಸಹ ಮಸ್ಕ್ ಅವರ ಮುನ್ನೋಟದಿಂದ ಹೊರತಾಗಿಲ್ಲ. 2030 ರ ವೇಳೆಗೆ, ಕೃತಕ ಬುದ್ಧಿಮತ್ತೆ ಹೊಂದಿದ ಸುಧಾರಿತ ಹ್ಯೂಮನಾಯ್ಡ್ ರೊಬೊಟ್‌ಗಳು ಕೆಲವು ಪ್ರಮುಖ ಶಸ್ತ್ರಚಿಕಿತ್ಸೆಗಳನ್ನು (Surgeries) ಮಾನವ ವೈದ್ಯರಿಗಿಂತಲೂ ಹೆಚ್ಚಿನ ನಿಖರತೆಯೊಂದಿಗೆ ನಿರ್ವಹಿಸಲಿವೆ ಎಂದು ಅವರು ಭವಿಷ್ಯ ನುಡಿದಿದ್ದಾರೆ. ಪ್ರಸ್ತುತ ವೈದ್ಯಕೀಯ ಜಗತ್ತಿನಲ್ಲಿ ಮಾನವರ ಉಸ್ತುವಾರಿಯಲ್ಲೇ ರೊಬೊಟಿಕ್ ಶಸ್ತ್ರಚಿಕಿತ್ಸೆಗಳು ನಡೆಯುತ್ತಿವೆಯಾದರೂ, ಭವಿಷ್ಯದಲ್ಲಿ ಸಂಪೂರ್ಣ ಸ್ವಯಂಚಾಲಿತ ರೊಬೊಟಿಕ್ ಸರ್ಜರಿಗಳು ಯಶಸ್ವಿಯಾಗಬೇಕಾದರೆ ಇನ್ನೂ ದೊಡ್ಡ ಮಟ್ಟದ ತಾಂತ್ರಿಕ ಪ್ರಗತಿ, ಕಟ್ಟುನಿಟ್ಟಾದ ನಿಯಂತ್ರಕ ಅನುಮತಿಗಳು ಮತ್ತು ಕಠಿಣ ಸುರಕ್ಷತಾ ಪರೀಕ್ಷೆಗಳು ಅತ್ಯಗತ್ಯ ಎಂದು ವೈದ್ಯಕೀಯ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

Also Read

ಚೀನಾದ ಅಭಿವೃದ್ಧಿಗೆ ಎಲಾನ್ ಮಸ್ಕ್ ಮೆಚ್ಚುಗೆ - ಜನರಿಗೆ ದೇಶಕ್ಕೆ ಭೇಟಿ ನೀಡುವಂತೆ ಕರೆ!!

ನಿವೃತ್ತಿ ಯೋಜನೆಗಳ ಬದಲಾಗಲಿರುವ ಆಯಾಮ

ಮಸ್ಕ್ ಅವರ ಮತ್ತೊಂದು ಪ್ರಮುಖ ಮುನ್ಸೂಚನೆಯು ಜನರ ನಿವೃತ್ತಿ ಯೋಜನೆಗಳಿಗೆ (Retirement Planning) ಸಂಬಂಧಿಸಿದ್ದಾಗಿದೆ. ತಂತ್ರಜ್ಞಾನದ ಕ್ಷಿಪ್ರ ಪ್ರಗತಿ ಮತ್ತು ಕೈಗಾರಿಕಾ ಉತ್ಪಾದಕತೆಯ ಹೆಚ್ಚಳವು ಜಾಗತಿಕ ಆರ್ಥಿಕ ವ್ಯವಸ್ಥೆಯನ್ನು ಎಷ್ಟು ತೀವ್ರವಾಗಿ ಬದಲಾಯಿಸಲಿದೆ ಎಂದರೆ, ಸಾಂಪ್ರದಾಯಿಕ ಉಳಿತಾಯ ಮತ್ತು ದೀರ್ಘಕಾಲೀನ ಹಣಕಾಸು ಯೋಜನೆಗಳ ಸ್ವರೂಪವೇ ಸಂಪೂರ್ಣವಾಗಿ ಹಳಿ ತಪ್ಪಲಿದೆ. ಆದರೆ, ಅರ್ಥಶಾಸ್ತ್ರಜ್ಞರು ಈ ವಾದಕ್ಕೆ ಭಿನ್ನ ಅಭಿಪ್ರಾಯ ವ್ಯಕ್ತಪಡಿಸಿದ್ದು, ನಿವೃತ್ತಿ ಜೀವನದ ಆರ್ಥಿಕ ಭದ್ರತೆಯು ಕೇವಲ ತಂತ್ರಜ್ಞಾನವೊಂದನ್ನೇ ಅವಲಂಬಿಸಿರುವುದಿಲ್ಲ; ಬದಲಿಗೆ ಸರ್ಕಾರದ ಸಾರ್ವಜನಿಕ ನೀತಿಗಳು, ಹೂಡಿಕೆಯ ಮೇಲಿನ ಆದಾಯ, ಹಣದುಬ್ಬರ ಮತ್ತು ಜನಸಂಖ್ಯಾ ಟ್ರೆಂಡ್‌ಗಳ ಮೇಲೆ ನಿರಂತರವಾಗಿ ಆಧಾರಿತವಾಗಿರುತ್ತದೆ ಎಂದು ಎಚ್ಚರಿಸಿದ್ದಾರೆ.

ದೂರದ ಭವಿಷ್ಯವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಮಾತನಾಡಿರುವ ಮಸ್ಕ್, ಪ್ರಪಂಚದಲ್ಲಿ ಮಾನವರಿಗಿಂತ ರೊಬೊಟ್‌ಗಳ ಸಂಖ್ಯೆಯೇ ಹೆಚ್ಚಾಗಲಿರುವ ದಿನಗಳು ಬರಲಿವೆ ಎಂದಿದ್ದಾರೆ. ಉತ್ಪಾದನೆ, ನಿರ್ಮಾಣ (Construction), ಸಾರಿಗೆ, ಕೃಷಿ ಮತ್ತು ಲಾಜಿಸ್ಟಿಕ್ಸ್‌ನಂತಹ ಕಠಿಣ ಪರಿಶ್ರಮದ ಉದ್ಯೋಗಗಳನ್ನು ರೊಬೊಟ್‌ಗಳೇ ವಹಿಸಿಕೊಳ್ಳಲಿವೆ. ಈ ರೀತಿಯ ಬೃಹತ್ ಆಟೊಮೇಷನ್ ಜಾಗತಿಕ ಉತ್ಪಾದಕತೆಯನ್ನು ಹಿಂದೆಂದೂ ಕಾಣದ ಮಟ್ಟಿಗೆ ಹೆಚ್ಚಿಸಲಿದೆ.

ಬದಲಾಗಲಿರುವ ಆರ್ಥಿಕ ಮಾದರಿಗಳು ಮತ್ತು ಜಾಗತಿಕ ಸವಾಲುಗಳು

ಭವಿಷ್ಯದಲ್ಲಿ ಇಂತಹ ಬೃಹತ್ ಪ್ರಮಾಣದ ಸ್ವಯಂಚಾಲಿತ ವ್ಯವಸ್ಥೆಗಳು ಜಾರಿಗೆ ಬಂದರೆ, ಮಾನವ ಸಮಾಜವು ತನ್ನ ಸಾಂಪ್ರದಾಯಿಕ ಆರ್ಥಿಕ ಮಾದರಿಗಳನ್ನು ಸಂಪೂರ್ಣವಾಗಿ ಮರುಪರಿಶೀಲಿಸಬೇಕಾಗುತ್ತದೆ ಎಂದು ಮಸ್ಕ್ ವಾದಿಸುತ್ತಾರೆ. ಎಐ ಮತ್ತು ರೊಬೊಟ್‌ಗಳು ಅತ್ಯಂತ ಕಡಿಮೆ ವೆಚ್ಚದಲ್ಲಿ ಭಾರಿ ಪ್ರಮಾಣದ ಸರಕು ಮತ್ತು ಸೇವೆಗಳನ್ನು ಉತ್ಪಾದಿಸುವುದರಿಂದ, ಜನರ ಕೆಲಸದ ಸ್ವರೂಪ, ವೇತನದ ರಚನೆ, ಸಂಪತ್ತಿನ ಸೃಷ್ಟಿ ಮತ್ತು ಹಣದ ನೈಜ ಮೌಲ್ಯವು ತೀವ್ರವಾಗಿ ಬದಲಾಗಲಿದೆ. ನವೀನ ತಂತ್ರಜ್ಞಾನದ ಮುಂಚೂಣಿಯಲ್ಲಿರುವ ಕಂಪನಿಗಳು ಕೇವಲ ಷೇರು ಮಾರುಕಟ್ಟೆಯ ಅಲ್ಪಾವಧಿಯ ಪ್ರದರ್ಶನವನ್ನು ಮೀರಿದ ಬೃಹತ್ ಮೌಲ್ಯವನ್ನು ಸೃಷ್ಟಿಸಲಿವೆ.

ಮಸ್ಕ್ ಅವರ ಈ ಆಲೋಚನೆಗಳು ಅತ್ಯಂತ ಮಹತ್ವಾಕಾಂಕ್ಷದಿಯಾಗಿದ್ದರೂ, ಮುಂಬರುವ ದಶಕಗಳಲ್ಲಿ ಎಐ ಮತ್ತು ರೊಬೊಟಿಕ್ಸ್ ಉದ್ಯಮಗಳನ್ನು ಪ್ರಭಾವಿಸುವುದಂತೂ ಸತ್ಯ ಎಂದು ಬಹುಪಾಲು ಸಂಶೋಧಕರು ಒಪ್ಪಿಕೊಳ್ಳುತ್ತಾರೆ. ಆದರೆ ಅದೇ ಸಮಯದಲ್ಲಿ, ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುವ ವೇಗ, ಸರ್ಕಾರದ ನಿಯಂತ್ರಕ ಚೌಕಟ್ಟುಗಳು, ನೈತಿಕ ಪರಿಗಣನೆಗಳು (Ethical Considerations), ಕಾರ್ಮಿಕರ ಉದ್ಯೋಗ ಬದಲಾವಣೆಯ ಸವಾಲುಗಳು ಮತ್ತು ಆರ್ಥಿಕ ನೀತಿಗಳು ಸಮಾಜದ ಭವಿಷ್ಯವನ್ನು ಹೇಗೆ ರೂಪಿಸಲಿವೆ ಎಂಬುದರ ಮೇಲೆಯೇ ಇವೆಲ್ಲವೂ ನಿರ್ಧರಿತವಾಗಲಿವೆ ಎಂದು ತಜ್ಞರು ನೆನಪಿಸಿದ್ದಾರೆ.

ಇಲಾನ್ ಮಸ್ಕ್ ಅವರ ಎಲ್ಲಾ ಭವಿಷ್ಯ ನಾಡಿಗಳು ನೂರಕ್ಕೆ ನೂರರಷ್ಟು ನಿಜವಾಗುತ್ತವೆಯೇ ಅಥವಾ ಇಲ್ಲವೇ ಎಂಬುದು ಸದ್ಯಕ್ಕೆ ಸ್ಪಷ್ಟವಾಗಿಲ್ಲ. ಆದರೆ, ಅವರ ಈ ದೂರದೃಷ್ಟಿಯು ಒಂದು ವಿಷಯವನ್ನು ಜಗತ್ತಿಗೆ ಸ್ಪಷ್ಟವಾಗಿ ನೆನಪಿಸುತ್ತಿದೆ; ಕೃತಕ ಬುದ್ಧಿಮತ್ತೆ ಮತ್ತು ರೊಬೊಟಿಕ್ಸ್ ತಂತ್ರಜ್ಞಾನಗಳು ಕೇವಲ ಆಧುನಿಕ ಉಪಕರಣಗಳಲ್ಲ, ಅವು 21 ನೇ ಶತಮಾನದ ದಿಕ್ಸೂಚಿಯಾಗಿದ್ದು, ಮಾನವ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಆರ್ಥಿಕ ಮತ್ತು ಸಾಮಾಜಿಕ ರೂಪಾಂತರದ ಮುಂಚೂಣಿಯಲ್ಲಿ ನಿಲ್ಲಲಿವೆ.