$60,000 ಪ್ರಮುಖ ಸಪೋರ್ಟ್ ಲೆವೆಲ್ ಕಟ್ - 2024ರ ನಂತರದ ಅತ್ಯಂತ ಕನಿಷ್ಠ ಮಟ್ಟಕ್ಕೆ ಕುಸಿದ ಬಿಟ್‌ಕಾಯಿನ್!!

ಜಾಗತಿಕ ಕ್ರಿಪ್ಟೋಕರೆನ್ಸಿ ಮಾರುಕಟ್ಟೆಯ ದೈತ್ಯ ಹಾಗೂ ಕಿಂಗ್ ಎಂದೇ ಪರಿಗಣಿಸಲ್ಪಟ್ಟಿರುವ 'ಬಿಟ್‌ಕಾಯಿನ್' (Bitcoin) ಮೌಲ್ಯದಲ್ಲಿ ತೀವ್ರ ಸ್ವರೂಪದ ಕುಸಿತ ಕಂಡುಬರುತ್ತಿದ್ದು, ಹೂಡಿಕೆದಾರರಲ್ಲಿ ಭಾರಿ ಆತಂಕ ಮೂಡಿಸಿದೆ. ಕಳೆದ ಕೆಲವು ವಹಿವಾಟು ಸರಣಿಗಳಲ್ಲಿ ನಿರಂತರ ಇಳಿಕೆ ಕಾಣುತ್ತಿದ್ದ ಬಿಟ್‌ಕಾಯಿನ್, ಇತ್ತೀಚಿನ ವಹಿವಾಟಿನಲ್ಲಿ ಅಕ್ಟೋಬರ್ 2024 ರ ನಂತರದ ಅತ್ಯಂತ ಕನಿಷ್ಠ ಮಟ್ಟವಾದ $58,995 (ಡಾಲರ್) ಮಟ್ಟಕ್ಕೆ ಕುಸಿದಿದೆ.

CANVA

ಕಳೆದ ಎರಡು ವರ್ಷಗಳ ಅವಧಿಯಲ್ಲಿ ದಾಖಲಾಗಿದ್ದ ಗರಿಷ್ಠ ಮೌಲ್ಯಕ್ಕೆ ಹೋಲಿಸಿದರೆ ಬಿಟ್‌ಕಾಯಿನ್ ಪ್ರಸ್ತುತ ಶೇಕಡಾ 50 ಕ್ಕಿಂತಲೂ ಹೆಚ್ಚು ಇಳಿಕೆ ಕಂಡಿದೆ. ಜಾಗತಿಕ ಮಾರುಕಟ್ಟೆಯ ಅನಿಶ್ಚಿತತೆ, ಹೂಡಿಕೆದಾರರ ಭಾರಿ ಲಾಭ ನಗದೀಕರಣ, ಯುಎಸ್ ಡಾಲರ್ ಮೌಲ್ಯದ ಭಾರಿ ಏರಿಕೆ ಹಾಗೂ ಹೂಡಿಕೆದಾರರ ಗಮನವು ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ವಲಯದತ್ತ ಮರಳುತ್ತಿರುವುದು ಈ ತೀವ್ರ ಪತನಕ್ಕೆ ಮುಖ್ಯ ಕಾರಣಗಳಾಗಿವೆ.

ಬಿಟ್‌ಕಾಯಿನ್‌ಗೆ ಇಡೀ ವರ್ಷದಾದ್ಯಂತ $60,000 ಮಟ್ಟವು ಅತ್ಯಂತ ನಿರ್ಣಾಯಕ ಹಾಗೂ ಬೆಂಬಲಿತ (Support level) ಮಟ್ಟವಾಗಿತ್ತು. ಈ ಮುಂಚೆ ಫೆಬ್ರವರಿಯಲ್ಲಿ ಹಾಗೂ ಜೂನ್ ಮೊದಲ ವಾರದಲ್ಲಿ ಬಿಟ್‌ಕಾಯಿನ್ ಬೆಲೆ ಕುಸಿತ ಕಂಡಾಗ ಈ $60,000 ಮಟ್ಟದಲ್ಲೇ ಪತನಕ್ಕೆ ತಡೆಯುಂಟಾಗಿತ್ತು. ಅಲ್ಲದೆ ಜೂನ್ ಮಧ್ಯಭಾಗದಲ್ಲಿ ಚೇತರಿಕೆ ಕಂಡು ಬೆಲೆಯು $67,000 ಗಡಿಯನ್ನು ದಾಟಿ ಮುನ್ನುಗ್ಗಿತ್ತು. ಆದರೆ ಈ ಬಾರಿ ಆ ನಿರ್ಣಾಯಕ ಮಟ್ಟವನ್ನು ಮುರಿದು ಕೆಳಕ್ಕೆ ಜಾರಿರುವುದು ತಜ್ಞರ ನಿದ್ರೆ ಕೆಡಿಸಿದೆ.

ಈ ಕುರಿತು ಪ್ರಸಿದ್ಧ ಕ್ರಿಪ್ಟೋ ವಿನಿಮಯ ಸಂಸ್ಥೆ ವಜೀರ್‌ಎಕ್ಸ್ (WazirX) ಸಂಸ್ಥಾಪಕರಾದ ನಿಶ್ಚಲ್ ಶೆಟ್ಟಿ ಮಾತನಾಡಿ, "ಕಳೆದ ಕೆಲವು ದಿನಗಳಿಂದ ಭೌಗೋಳಿಕ ರಾಜಕೀಯ ಅನಿಶ್ಚಿತತೆ ಹಾಗೂ ಮಾರುಕಟ್ಟೆಯ ಹಣದ ಹರಿವಿನ ನಿರೀಕ್ಷೆಯಿಂದಾಗಿ ಏರಿಕೆಯಾಗಿದ್ದ ಆಸ್ತಿಗಳ ಮೇಲೆ ಹೂಡಿಕೆದಾರರು ಭಾರಿ ಪ್ರಮಾಣದಲ್ಲಿ ಲಾಭ ಗಳಿಕೆಗೆ (Profit Booking) ಮುಂದಾಗಿದ್ದಾರೆ. ಇಲ್ಲಿ ಗಮನಿಸಬೇಕಾದ ಪ್ರಮುಖ ಅಂಶವೆಂದರೆ ಬಿಟ್‌ಕಾಯಿನ್, ಚಿನ್ನ ಮತ್ತು ಕಚ್ಚಾ ತೈಲ ಮೂರೂ ಒಟ್ಟಿಗೆ ಕುಸಿಯುತ್ತಿವೆ. ಅಂದರೆ ಹೂಡಿಕೆದಾರರು ಜಾಗತಿಕ ಮಾರುಕಟ್ಟೆಯ ಒಂದೇ ರೀತಿಯ ರಿಸ್ಕ್‌ನಿಂದ ತಮ್ಮ ಹೂಡಿಕೆಯನ್ನು ಹಿಂಪಡೆಯುತ್ತಿದ್ದಾರೆ" ಎಂದು ವಿಶ್ಲೇಷಿಸಿದ್ದಾರೆ.

Also Read

ಬಿಟ್‌ಕಾಯಿನ್‌ ಭರ್ಜರಿ ಏರಿಕೆ - $70,000 ದಾಟಲು ಕಾರಣವೇನು, ಮುಂದೆ ಏನಾಗಬಹುದು?!!

ವಿವಿಧ ಜಾಗತಿಕ ಆರ್ಥಿಕ ವರದಿಗಳ ಪ್ರಕಾರ, ಬಿಟ್‌ಕಾಯಿನ್ ಬೆಲೆಯ ಕುಸಿತವು ಇಲ್ಲಿಗೆ ಮುಕ್ತಾಯವಾಗಿಲ್ಲ ಮತ್ತು ಇದು ಇನ್ನು ಶೇಕಡಾ 30 ರಷ್ಟು ಇಳಿಕೆಯಾಗುವ ಸದ್ಯದ ಸಾಧ್ಯತೆಯಿದೆ. ಈ ವರ್ಷದ ಕೊನೆಯ ತ್ರೈಮಾಸಿಕದ (ಅಕ್ಟೋಬರ್-ಡಿಸೆಂಬರ್) ಅವಧಿಯಲ್ಲಿ ಬಿಟ್‌ಕಾಯಿನ್ ಬೆಲೆಯು ಗರಿಷ್ಠ ಅಂದರೆ $42,000 ರಿಂದ $44,000 ಮಟ್ಟಕ್ಕೆ ಮತ್ತಷ್ಟು ಕುಸಿಯಬಹುದು ಎಂದು ಕಾಯಿನ್‌ಡೆಸ್ಕ್ (CoinDesk) ವರದಿ ಮಾಡಿದೆ.

ಚೀನಾದ ಪ್ರಸಿದ್ಧ ಬಿಟ್‌ಕಾಯಿನ್ ಮೈನರ್ ಹಾಗೂ ಲೆಬಿಟ್ (LeBit) ಮೈನಿಂಗ್ ಪೂಲ್ ಸಂಸ್ಥಾಪಕರಾದ ಜಿಯಾಂಗ್ ಝುವೊಯರ್ ಅವರ ಪ್ರಕಾರ, ಅಕ್ಟೋಬರ್ ಮತ್ತು ಡಿಸೆಂಬರ್ ತಿಂಗಳ ಮಧ್ಯಭಾಗದಲ್ಲಿ ಬಿಟ್‌ಕಾಯಿನ್ $42,000–$44,000 ವ್ಯಾಪ್ತಿಯಲ್ಲಿ ವಹಿವಾಟು ನಡೆಸುವ ಸಾಧ್ಯತೆ ಹೆಚ್ಚಾಗಿದೆ. ಮತ್ತೊಂದೆಡೆ ಸಿಎನ್‌ಬಿಸಿ (CNBC) ವರದಿಯ ಪ್ರಕಾರ, ಐಶೇರ್ಸ್ ಬಿಟ್‌ಕಾಯಿನ್ ಟ್ರಸ್ಟ್ ಇಟಿಎಫ್ (IBIT) ಇತ್ತೀಚೆಗೆ ಸುಮಾರು 11 ಲಕ್ಷ ಆಪ್ಷನ್ಸ್ ವಹಿವಾಟು ನಡೆಸಿದ್ದು, ಇದು ಕಳೆದ 30 ದಿನಗಳ ಸರಾಸರಿಗಿಂತ ದುಪ್ಪಟ್ಟಾಗಿದೆ. ಹೂಡಿಕೆದಾರರು ಭವಿಷ್ಯದ ಆರ್ಥಿಕ ನಷ್ಟದಿಂದ ರಕ್ಷಣೆ ಪಡೆಯಲು (Hedging) ಒಲವು ತೋರುತ್ತಿರುವುದು ಈ ವ್ಯಾಪಕ ವಹಿವಾಟಿನಿಂದ ಸ್ಪಷ್ಟವಾಗುತ್ತದೆ.

ಬಿಟ್‌ಕಾಯಿನ್‌ನ ಈ ಭಾರಿ ಪತನಕ್ಕೆ ಭೌಗೋಳಿಕ ರಾಜಕೀಯ ಬೆಳವಣಿಗೆಗಳ ಹೊರತಾಗಿ, ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಹೂಡಿಕೆಗಳು ಜಾಗತಿಕವಾಗಿ ಭಾರಿ ಪ್ರಮಾಣದಲ್ಲಿ ಹೆಚ್ಚುತ್ತಿರುವುದು ಪ್ರಮುಖ ಕಾರಣವಾಗಿದೆ. ಹಣದ ಹರಿವು ಈಗ ಡಿಜಿಟಲ್ ಕರೆನ್ಸಿಗಳಿಂದ ಎಐ ಹಾಗೂ ಪ್ರಮುಖ ತಂತ್ರಜ್ಞಾನ ಷೇರುಗಳ ಕಡೆಗೆ ಬಲವಾಗಿ ಮರಳುತ್ತಿದೆ. ಇದೇ ಸಮಯದಲ್ಲಿ ಬಿಟ್‌ಕಾಯಿನ್ ಇಟಿಎಫ್‌ಗಳ (ETF) ಒಳಹರಿವು ಮುಂಚಿನ ಅವಧಿಗೆ ಹೋಲಿಸಿದರೆ ಅತ್ಯಂತ ಮಂದಗತಿಯಲ್ಲಿದೆ.

ಇದು ಮಾರುಕಟ್ಟೆಯಲ್ಲಿ ತಾತ್ಕಾಲಿಕ ಅಸಮತೋಲನವನ್ನು ಸೃಷ್ಟಿಸಿದ್ದು, ಮಾರಾಟದ ಒತ್ತಡಕ್ಕೆ ತಕ್ಕಂತೆ ಖರೀದಿದಾರರ ಬೇಡಿಕೆ ಇಲ್ಲದಂತಾಗಿದೆ. ಇದರ ಜೊತೆಗೆ, ಯುಎಸ್ ಡಾಲರ್ ಸೂಚ್ಯಂಕವು (US Dollar Index) 13 ತಿಂಗಳ ಗರಿಷ್ಠ ಮಟ್ಟಕ್ಕೆ ಏರಿದ್ದು, ಡಾಲರ್ ಮೌಲ್ಯ ಹೆಚ್ಚಾದಾಗ ಬಿಟ್‌ಕಾಯಿನ್ ಮೌಲ್ಯ ಕುಸಿಯುವ ಐತಿಹಾಸಿಕ ಪ್ರವೃತ್ತಿ ಇಲ್ಲೂ ಪುನರಾವರ್ತನೆಯಾಗಿದೆ. ಪ್ರಸ್ತುತ ಮಾರುಕಟ್ಟೆಯು ಅತ್ಯಂತ ಆತಂಕಕಾರಿ ಹಾಗೂ ಅಸ್ಥಿರ ವಾತಾವರಣದಲ್ಲಿದ್ದು, ಹೂಡಿಕೆದಾರರು ಹೊಸದಾಗಿ ಖರೀದಿಸುವಾಗ ಅಥವಾ ಮಾರುಕಟ್ಟೆಯಿಂದ ಹೊರಬರುವಾಗ ಅತ್ಯಂತ ಜಾಗರೂಕತೆಯಿಂದ ಹೆಜ್ಜೆ ಇಡುವುದು ಅಗತ್ಯವಾಗಿದೆ.